Manter a mediana e mellorar a avenida de Oza

Na campaña de información que levamos a cabo a AAVV Oza Gaiteira Os Castros, comentando coa veciñanza o despilfarro e o empeoramento para o barrio que supón a retirada da mediana na avenida de Oza, puidemos comprobar como a maioría das persoas están en contra desta desfeita, tamén escoitamos propostas que nos parecen moi interesantes e que recollemos neste escrito.

A mellora na calidade de vida e no comercio local que supuxo a reforma da avenida de Oza é evidente, case ninguén o discute, aínda así hai actuacións que mellorarían a zona. Tendo rúas alternativas como a rolda de Outeiro e a avenida do Exército, o tráfico pesado debería prohibirse na avenida de Oza, os camións que non fagan reparto na propia rúa deben desviarse, mellorando deste xeito o tráfico e reducindo o ruído e a contaminación ambiental.

As paradas dos buses urbanos poden desprazarse uns metros e deixar espazo para que o resto de vehículos poidan circular pola rúa mentres están parados os buses. Tamén habería que desprazar a parada que está enriba da ponte sobre a rúa río Monelos pois xera moito ruído tal e como está posta agora.

Estamos a tempo de salvar a mediana que existe entre Ramón y Cajal e a rolda de Outeiro, con pequenas actuacións que supoñen pouco investimento pode mellorarse a rúa e manter a zona verde sen arrincar máis árbores. Nestes tempos de crise, que afecta moi gravemente ao comercio local, estas actuacións poden ser un apoio importante para o pequeno comercio da zona.

É evidente que cando a veciñanza dispón de rúas pouco transitadas e agradables para o paseo, o pequeno comercio e a hostalaría teñen máis posibilidades. Na Gaiteira – Os Castros queremos ter as mesmas oportunidades que os barrios do centro, non queremos ser barrios periféricos que só soportan o tráfico e a contaminación. Temos dereito a unha calidade de vida como é debido e por ese dereito traballará esta asociación.