Os verquidos  forman parte dun grave problema ambiental

Os verquidos que se sucederon na  no porto hai uns días forman parte dun grave problema ambiental contra o que levamos máis de trinta anos loitando no noso barrio.

A asociación veciñal  Oza Gaiteira Os Castros levamos moito tempo loitando contra as descargas incontroladas e verquidos  no porto, contra a contaminación do porto, a zona maritima de Oza e a Ría , levamos tempo denunciando o comportamento dunhas autoridades que non están a defender os dereitos dos veciños e veciñas.

Xa temos denunciado que a Autoridade Portuaria non controla as actividades que se desenvolven nos seus terreos e que algunhas administracións permanecen agochadas cada vez que hai verquidos contaminantes no porto, que se permite facer as descargas de carbón e outros graneis sen ningún control, que se descargan hidrocarburos de xeito totalmente incorrecto pois inundan o barrio de cheiros insoportables, que se realizan desguaces sen tomar medidas de protección, que non se fai ningún control sobre a balsa de lodos de Oza...

O noso colectivo non entende como se permite que todo isto suceda unha e outra vez, non entendemos como a fiscalía de delitos medio ambientais non actúa, que ten que acontecer para que a xustiza defenda aos veciños e veciñas? .

Os anos pasan e os problemas lonxe de solucionarse repítense unha e outra vez, cada vez vemos con máis claridade que as administracións non están a defender os intereses das persoas.

Non lles importa a saúde das persoas, non lles importa o traballo de mariñeiros e mariscadoras que se quedan sen ingresos, non lles importa o dano medio ambiental que se provoca, nada importa para que os negocios duns poucos sexan cada vez máis rendibles. Permiten que se destrúa o noso territorio, que se atente contra a nosa saúde e o noso traballo, o único que lles preocupa é manter os privilexios duns poucos.

O noso colectivo veciñal non se vai dar por vencido, seguiremos a loitar pola nosa saúde e o noso traballo, seguiremos defendendo o noso territorio e patrimonio ate o día que as administracións entendan que as cousas se teñen que facer doutro xeito.